Konferansen Klarspråk 2025 – i ein digital kvardag! vart arrangert 3.–4. april.

Programmet baud på ei rekkje engasjerande og matnyttige foredrag, med stor breidde og ispedd mykje humor.

Torunn Reksten, fagansvarleg for klarspråk i Språkrådet, sette tonen for konferansen i sitt opningsforedrag:

– Klarspråk handlar om tillit og empati. Og tillit er nøkkelen til eit velfungerande samfunn.

Foredragshaldarane hadde ordet i si makt – og ord er òg makt. Det betyr noko korleis vi brukar denne makta. Som Ragnhild Jepsen, biskop i Bjørgvin, sa heilt til slutt i foredraget sitt:

– Eg trur språk har utrulege moglegheiter. Og det er viktigare enn nokon gong – for å inkludere, for å stadfeste den andre, og for å gjere trygt.

Kunstig intelligens vart, naturleg nok, òg belyst i fleire foredrag og i ein avsluttande samtale på scena.

Vi gir deg eit innblikk i viktige tema gjennom 13 artiklar.

God lesnad!

Vennleg helsing
Torbjørn Vinje
dagleg leiar

---